AR GWASK LIESKROG
Hiziv en deus graet an aotroù ac’hanon ur reuziad teusteukiñ e-keit m’edo an aotroù all o kas un tamm labour… gwrierezh. Dre ma oa an traoù o vont a-dreuz ganin, un disterdra, em eus ranket dizober ar pezh na oa nemet hanter c’hraet, dre chañs, hag implijout, e-sell-se, ur gwask lieskrog. Pa welis ar benveg troadet melen-aour em dorn e savas esmae enno. Istor ar gwask-se zo eveek. Pa oan bet o welout Vladimir evit ar wech kentañ, en e di, dic’houzvez a-grenn an tamm ac’hanon war disoc’h an emwel-se, em boa bet ur gudenn gant gwerenn dor blenier ma c’harr hag a gouezhe d’an traoñ anezhi hec’h-unan. Gennet em boa tammoù kartoñs er faout d’he derc’hel gwintet met a-wechoù ez ae d’an traoñ memestra hag ur gwask am beze ezhomm neuze d’he adtapout. Vladimir a brestas din e wask lieskrog betekgouzout e kouezhe ar werenn war ma distro da Vreizh. Tro hor bo d’en em welout un eil gwech paneveken, a lâras neuze an eil pe egile, ha rentet e vefe ar gwask, sur. Biskoazh ne soñjas hini er gwask abaoe ha chom a reas ganin. Vladimir en deus adkavet anezhañ met en un doare na’m bije biken soñjet ennañ en deiz-se, dre vevañ en un tiad ganin.